Migrate iPhone To Android: Samsung Galaxy Note II 神筆，凌空變法

2012年8月31日星期五

Samsung Galaxy Note II 神筆，凌空變法

三星以Magic做主題，搵
咗唔少靚女扮魔術師。

《德國直擊》曾經，Galaxy Note平板唔似平板、手機又唔似手機嘅Size，令好多人質疑佢定位，結果大賣而令唔少人跌眼鏡。事隔一年，Note II出擊，全球期待，除咗規格再上一層，S Pen功能提升，電磁感應大玩凌空控制，直頭好似神仙筆咁好玩。

Air View隔空檢視

柏林IFA未正式開波，Samsung已急不及待嚟個大晒冷，最受期待當然係Note II，除咗三角形筆身加粗咗、筆身按鈕加入轉換功能外，新加嘅Air View亦相當實用好玩，只要凌空指住Email即可睇到郵件內容、指住相簿就可預覽當中相片，亦可預視影片等，實試下感覺實在方便，令S Pen有如神仙棒，貼切番晒大會「Magic」主題。

除凌空檢視，Note II亦將S Pen功能完美整合，上一代的Easy Clip在《S Memo》剪剪貼貼大受歡迎，今次更進化到可將剪下的圖像，即時放到Email、MMS及其他Apps中，用途更廣泛。另外，S Pen亦可直接在《S Planner》書寫，更可在每張相片背後加上私人註腳，令Note II用法更似一本真「Note Book」。

場內座無虛席，人人都期待三星又一機王誕生。	5.5吋16:9巨芒，睇片睇相都超正，特別係睇HD電影更係Fit晒。	凌空手指指，影片即時彈出預覽Timeline。
大量專用Apps令S Pen用法更多元化。	相簿都係，凌空一指便可睇到或拖放。	可直接寫嘢上《S Planner》，用得直接爽手。

屏幕加大　解像度變低

S Pen進化夠勁夠多元化，機身硬件配備亦同樣唔惹少，1.6GHz四核心加埋2GB RAM，比出咗冇耐嘅SIII更強，現場試玩各個Apps、睇片睇相、多工工作等盡開功能，操作都完全順暢無比，兼有餘力，加上預設最新Android4.1，應該無乜嘢難到佢。雖然個餡勁咁多，重量只係微升2g，而厚度更係比Note更薄，手感自然更好。講咗咁耐，點可以唔講Note系列的最大賣點巨芒呢？同傳聞一樣，Note II嘅芒比Note大0.2吋，變成5.5吋，較特別嘅係轉換成16:9，更加適合睇電影，甚至YouTube的HD片段。不過亦因由16:10變成16:9，Note II嘅解像度比Note低少少，變成1,280×720，但基本上唔影響畫面質素，而機身相對修長亦更好揸手。

Note II較修長，拍埋GS III度感覺唔算好巨型。	暫有黑白兩色，個人覺得有金屬味嘅黑色較有型。	1.6GHz四核加埋2GB RAM，容量最大64GB。
	Hannah：「Note II雖然有成5.5吋大芒，但Size唔算好笨重，而16:9芒睇片就確實好正。」	Dustin：「自己都用開Note，感覺Note II方便好多同快好多，會換機。」