Migrate iPhone To Android: ViewSonic VB73G 呢部巨芒平板扮手機，七吋闊過臉

2012年8月23日星期四

ViewSonic VB73G 呢部巨芒平板扮手機，七吋闊過臉

話說早幾年未興智能電話前，揀手機都係一味求細，細到連數字鍵都㩒唔到，一樣有人 Buy。風水輪流轉，今時今日揀電話，4、5吋芒都嫌細，唔夠用， ViewSonic呢部7吋巨芒 VB73G，行 Android4.0.3，兼且有埋電話功能，打電話就唔怕㩒錯 Number！

手機平板兩用

手機「玩家」阿傑，換機頻密，近期由5.3吋 Note轉玩4.8吋 S3，不過佢一向愛大芒，已經大叫唔夠用：「用慣大芒，轉番去細啲芒好唔習慣！用 Note時，上網睇網頁不用經常放大都睇得晒，轉用 S3芒細啲，睇戲無咁過癮囉！」

見佢咁愛大芒，我就提議佢試吓 ViewSonic VB73G，本身就有7吋屏幕，滿足晒視覺上的需求，而且解像度都有1,024×600，瀏覽網頁時，大半個頁面內容都可一次睇晒，充份利用到大芒的優點！最重要仲係內置3G通話功能，一部機集合平板同手機功能，唔想咁大部機貼住塊臉講電話，跟機仲好貼心地附有線免提，講電話同聽歌都啱用。

阿傑鍾情大芒，用免提講電話，唔怕大部。

7吋大芒，睇網頁時，自然都可睇得更多。

平凡的機背，但連鏡頭都飛走，只有前置的30萬像素。

直駁電視1080p高清輸出

近期買 Android手機，梗係挑選4.0嘅機種，呢部 VB73G出機就已預載了 Android4.0.3，可以享用到更實用的多工操作、頻寬管理等新功能，雖然配搭的處理器只是單核 ARM Cortex A81.2GHz，係無跑車級的速度享受，但 Apps的操作、上網睇網頁等操作還算流暢，更有 Smooth Play功能，可以硬件對1080p H.264視頻解碼，阿傑試看了一段短片：「影片播放流暢還算合格，但屏幕色水就一般喇。」雖然屏幕質素只算普通，不過見佢有埋 mini HDMI，可直駁大電視睇 Full HD，算補番數啦！